عندك منتج وبتبيع على إنستغرام
بتاخد الطلبات بالرسائل، وبتضيع وقت بالرد على نفس الأسئلة. المتجر هون بيشتغل كمنظومة طلبات، مش كواجهة عرض.
خدمة — تصميم وإنشاء متجر إلكتروني
تصميم متجر إلكتروني يبيع، مش بس يعرض منتجات
أغلب المتاجر ما بتخسر مبيعات لأن المنتج مش منيح. بتخسرها لأن الزبون ما لقي جواب لسؤال بسيط: ليش أشتري من هون بالذات، وشو بصير بعد ما أضغط "اطلب". منبني المتجر حوالين هالسؤال.
المشكلة الحقيقية مش بالتصميم
ممكن يكون متجرك حلو وبنفس الوقت ما بيبيع. لأن الشكل بيوقف الزائر ثانية، بس اللي بيخليه يكمّل هو وضوح المنتج، الثقة، وسهولة الطلب.
اللي منشوفه غالبًا بالمتاجر اللي بتوصلنا: صور منتجات من مصادر مختلفة وأحجام مختلفة، وصف منتج مكتوب مرة وحدة وما حدا رجع عليه، سعر الشحن بيظهر بآخر خطوة، وطريقة تواصل مش واضحة إذا الزبون تردد.
كل وحدة من هدول مش "خطأ تصميم". كل وحدة نقطة بيخسر فيها المتجر زبون كان جاهز يشتري.
الزبون ما بيعرف إذا في حدا فعلًا وراء المتجر
اسم واضح، طرق تواصل شغالة، سياسات مكتوبة، وصور حقيقية للمنتج — مش صور كتالوج بس.
الطلب بياخد خطوات أكثر من اللازم
Checkout قصير، حقول أقل، ودفع عند الاستلام لما يكون هو المتوقع بالسوق.
المنتج معروض بدون سبب للشراء
صفحة منتج بترتب المعلومة حسب سؤال الزبون: شو هو، ليش يناسبني، شو بصير بعد الطلب.
ما في طريقة تكمّل الحكي
واتساب مباشر من صفحة المنتج، لأن جزء كبير من زباين السوق العربي بيحبوا يسألوا قبل ما يدفعوا.
لمين هالخدمة
هالصفحة إلك إذا كنت بموقع من هالثلاثة:
بدك تشغّل إعلانات ممولة
الإعلان بيجيب زيارات بسرعة، وبيكشف كل ضعف بالمتجر بنفس السرعة. لازم يكون المتجر جاهز للترافيك قبل ما تصرف عليه.
عندك محل على أرض الواقع
بدك امتداد أونلاين مرتب يخدم نفس الزبائن، مش نسخة ناقصة من المحل.
إذا عندك متجر شغّال وبدك تحسين بس مش إعادة بناء — الخدمة الأنسب إلك هي تحسين معدل التحويل، مش هاي.
شو بيتضمن بناء المتجر
المتجر بينبنى على WooCommerce/WordPress، يعني الملكية الكاملة إلك: الدومين، البيانات، وقائمة الزبائن. مش مستأجر على منصة بتاخد عمولة على كل طلب.
بنية المتجر والتصنيفات
ترتيب المنتجات بطريقة الزبون بيفكر فيها، مش بطريقة المخزن.
صفحة منتج مبنية للقرار
ترتيب المعلومة، الصور، الخيارات، ونقاط الثقة بمكانها الصح.
سلة وCheckout قصير
أقل خطوات ممكنة، سعر الشحن واضح من بدري، ودفع عند الاستلام لما يكون مطلوب.
عربي RTL كامل
الاتجاه، الخطوط، الأرقام والنماذج — مش قالب إنجليزي معكوس.
موبايل أول
لأن أغلب الترافيك من إنستغرام وفيسبوك، والتجربة على الموبايل هي التجربة الحقيقية.
واتساب مربوط
زر مباشر مع سياق المنتج، حتى ما يبدأ الزبون المحادثة من الصفر.
التتبع من أول يوم
Meta Pixel وGA4 وأحداث View / Add to Cart / Checkout / Purchase، حتى تعرف شو بصير بعد النقرة.
أساس تقني نظيف
سرعة، عناوين صفحات مضبوطة، Sitemap، وSchema — حتى المتجر يكون قابل للأرشفة من البداية.
كيف بتمشي الشغلة
01
نفهم المنتج والسوق
شو بتبيع، لمين، وشو الاعتراض الأكبر عند الزبون قبل ما يشتري.
02
نتفق على البنية
التصنيفات، عدد المنتجات، اللغات، وطرق الدفع والشحن.
03
نسخة أولية خلال 24–48 ساعة
بتشوف الاتجاه البصري وبنية المتجر قبل ما نكمّل التنفيذ.
04
التنفيذ والمنتجات
بناء الصفحات، إدخال المنتجات، الربط، والتتبع.
05
اختبار وتسليم
تجربة طلب كاملة على موبايل وديسكتوب قبل الإطلاق. التسليم النهائي خلال 3–7 أيام.
متاجر نفّذناها
مشاريع حقيقية، بتقدر تفتحها وتشوفها شغالة — مش صور من قالب.
بيت الملكة | Home Queen
متجر إلكتروني
متجر ملابس نسائية داخلية وبيجامات ولانجيري بتصميم أنثوي فخم، عربي كامل RTL مع دفع عند الاستلام وواتساب مباشر.
غزل ستور | Ghazal Store
متجر إلكتروني
متجر إكسسوارات ومنتلزمات عامة — شنط، كلاتشات، أحزمة، نظارات وساعات، مع أقسام وماركات وعروض حتى 50% ودفع عند الاستلام.
أسئلة شائعة
قديش بياخد وقت إنشاء متجر إلكتروني؟
بتشوف نسخة أولية خلال 24–48 ساعة، والتسليم النهائي عادةً بين 3 و7 أيام. الوقت بيتأثر بشكل أساسي بعدد المنتجات وجهوزية الصور والنصوص عندك.
ليش WooCommerce ومش منصة جاهزة؟
لأن الملكية والبيانات بتضل إلك، وما في عمولة على كل طلب، والتحكم بصفحة المنتج والـCheckout مفتوح. المنصات الجاهزة أسرع بالبداية بس بتحدّك لما تكبر أو لما تحتاج تعدّل شي خارج القالب. إذا وضعك بيناسب منصة جاهزة أكثر، منقلك هالشي.
شو بحتاج أجهّزه قبل ما نبلش؟
صور المنتجات، أسماء وأسعار، معلومات الشحن والمناطق اللي بتوصلها، وطريقة الدفع اللي بدك تعتمدها. إذا في نقص بالصور أو النصوص منحكيلك من البداية شو بيأثر على الجدول الزمني.
بيشتغل بالعربي والعبري؟
نعم. بنبني المتجر عربي RTL كامل، وبنقدر نضيف نسخة عبرية بنفس المتجر إذا سوقك بيحتاجها.
بتضمنوا مبيعات؟
لا. المبيعات بتتأثر بالمنتج والسعر والعرض والإعلان والسوق. اللي منتحمل مسؤوليته هو إن المتجر ما يكون هو سبب ضياع الطلب: تجربة شراء واضحة، ثقة، وقياس بيخليك تعرف وين المشكلة فعليًا.
بتساعدوا بعد التسليم؟
بنسلّمك المتجر شغّال مع شرح للإدارة الأساسية. أي تطوير أو تعديل بعد الإطلاق منتفق عليه لحاله حسب نطاقه.
ابعتلنا فكرة المشروع، ومنوريك نقطة البداية
إذا لسه ما عندك متجر، منراجع المنتج والحضور الحالي ومنعطيك تصور أولي لاتجاه المتجر — بدون التزام.