من الإعلان للصفحة
هل الصفحة اللي بيوصلها الزائر بتكمّل نفس الوعد اللي شافه بالإعلان، ولا بترجّعه للبداية؟
خدمة — Conversion Upgrade
تحسين معدل التحويل للمتاجر الإلكترونية
إذا الإعلان بيجيب زيارات والمتجر ما بيبيع، المشكلة غالبًا مش بميزانية الإعلان. المشكلة بالمسافة بين النقرة وإتمام الطلب. هاي الخدمة بتشتغل على هالمسافة بالذات.
مش كل متجر بيحتاج إعادة بناء
كتير متاجر أساسها منيح: المنتج مطلوب، الصور مقبولة، والترافيك موجود. بس في ثلاث أو أربع نقاط بتوقف الزبون، وهي اللي بتحدد النتيجة.
إعادة بناء المتجر بهالحالة بتكلفك وقت وفلوس وما بتحل المشكلة بالضرورة. الأذكى إنك تعرف وين بالضبط بيوقف الزبون، وتصلح هاي النقاط.
وين منفحص
الصفحة الرئيسية
هل بتوضح شو بتبيعوا ولمين بأول شاشة، ولا الزائر لازم يبحث؟
صفحة المنتج
ترتيب المعلومة، الصور، الخيارات، الشحن، والإجابة على الاعتراض قبل ما ينسأل.
السلة والـCheckout
عدد الخطوات، الحقول، مفاجآت سعر الشحن، ورسائل الأخطاء.
الثقة
مين وراء المتجر، سياسة الاستبدال، طرق التواصل، وهل في دليل حقيقي على إنه متجر شغّال.
القياس
هل الأحداث مركّبة صح؟ بدون بيانات سليمة كل قرار تحسين بيصير تخمين.
شو بتطلع فيه
قائمة مرتبة بالأولوية
مش كل ملاحظة بتستاهل شغل. منرتبها حسب الأثر المتوقع والجهد.
تصور بصري لأهم جزء
حتى تشوف الفرق بدل ما تتخيله.
تعديلات منفّذة
حسب النطاق المتفق عليه — على الصفحة الرئيسية، صفحة المنتج، الـCheckout أو الثقة.
تتبع مضبوط
حتى تقدر تقيس أثر التعديلات بدل ما تحكم بالإحساس.
ما منوعد بنسبة تحسّن معينة. أي حدا بيعطيك رقم مضمون قبل ما يشوف متجرك بيبيعلك وهم.
شغل نفّذناه
أسئلة شائعة
شو الفرق بين هالخدمة وبناء متجر جديد؟
هون منشتغل على متجر موجود ومنحسّن الأجزاء اللي فعلًا بتوقف الزبون. البناء الجديد بيكون لما الأساس نفسه ما بيسمح بالتحسين — قالب مقفول، بنية منتجات مكسورة، أو منصة ما بتعطيك تحكم.
كيف بتعرفوا شو بيحتاج تحسين؟
منمشي برحلة الشراء كأننا زبون، على موبايل وديسكتوب، ومنراجع البيانات المتاحة إذا التتبع مركّب. الملاحظات بتطلع من هالمسار مش من قائمة عامة.
قديش بتحتاج الخدمة وقت؟
الفحص بيكون سريع. مدة التنفيذ بتعتمد على نطاق التعديلات المتفق عليها — من تعديلات محدودة على صفحة المنتج والـCheckout، لإعادة بناء واجهة كاملة.
هل الفحص المجاني هو نفسه الخدمة؟
لا. الفحص المجاني بيعطيك أهم 5–7 ملاحظات وتصور بصري واحد، حتى تعرف إذا في شغل يستاهل أصلًا. الخدمة الكاملة هي التنفيذ.
إذا التتبع مش مركّب عندي؟
منركّبه كجزء من الشغل. بدون Meta Pixel وGA4 وأحداث السلة والطلب، ما في طريقة نعرف فيها إذا التعديل نفع.
ابعت رابط متجرك، ومنوريك وين بتضيع الطلبات
فحص مختصر لتجربة الشراء، أهم 5–7 ملاحظات، وتصور بصري واحد لأهم جزء — بدون التزام.